Drifkraftur þjóðarátaksins er að koma íslenskri raforku inn í samgöngur og hefur EVEN tekið skýra afstöðu um að rafmagn sé besta kosturinn fyrir Ísland.

Færa má fjölmörg rök fyrir því að við ættum að skipta hefðbundnum bílum út fyrir rafbíla en við látum nægja að nefna:

Sparnaður á gjaldeyri – innflutningur orku
Að flytja inn orku í land sem er fullt af mjög ódýrri og aðgengilegri „grænni“ orku er ekki mjög vitrænt. Óvíða er raforkan ódýrari en hér á landi og þarf ekki að fara fleiri orðum um það.  Áætlaður sparnaður er tugir milljarða á ári. Líkja má slíkum orkuskiptum við það er þjóðin tók þá ákvörðun að skipta olíu út við upphitun húsa og nota í stað þess rafmagn og heitt vatn. Sparnaður vegna þeirrar aðgerðar nam 67 milljörðum á árinu 2009. 

Er ekki komin tími til að staldra við og minka komu svona orkuskipa til landsins ?

Sparnaður á gjaldeyri – innflutningur varahluta
Lægri kostnaður við viðhald er einnig gífurlegur enda 2/3 viðhalds sem dettur út en stór hluti af því eru innkeyptir varahlutir. Áætlað virði bílaflotans á Íslandi er 500 milljarðar ! Það þarf töluverða peninga til að viðhalda þessum 500 milljörðum í formi viðhalds og varahluta. 

Hægt er að spara marga milljarða á hverju ári ef bílaflotanum er skipt yfir í rafbíla.

Nýting á raforkukerfi
Fáar þjóðir í heiminum eiga jafn gott raforkukerfi og við íslendingar. Með því að nota rafmagn í samgöngum greiðum við fyrr niður þessa fjárfestingu. Við búum við það gott kerfi að einungis þarf að bæta við „seinustu 5 metrunum“ til að fá heildarkerfi fyrir rafbíla um land allt. Fá lönd hafa viðlíka tækifæri og við höfum hér á landi hvað þetta varðar.


Með nýtingu raforku í samgöngum greiðum við fyrr niður núverandi fjárfestingar í raforkuvirkjum.

Minni mengun
Um þennan þátt þarf ekki að fjölyrða þar sem einungis er um að ræða mengun við framleiðslu rafbíla og nánast engin mengun er við framleiðslu á raforkunni hér á landi né við notkun bílsins. Með öðrum orðum þá er kolefnisfótsporið nánast ekkert við notkun og rekstur rafbíla. Ríkisstjórnir um allan heim keppast við að finna lausnir til að minka mengun í samgöngum og eigum við einstaka möguleika hér á landi í þeim efnum. 


Samkvæmt World Health Organisation, deyja um 900.000 manneskjur á hverju ári vegna lélegra loftgæða og loftmengunar.